MONDA TAGO DE RIFUĜINTOJ: MESAĜO AL UNUIĜINTAJ NACIOJ DE UNIVERSALA ESPERANTO-ASOCIO

Monda Tago de Rifuĝintoj (20-a de junio) reprezentas specialan okazon por fari tion kion ni devas fari en ĉiu tago de la jaro, nome konsideri kaj mildigi la malfeliĉan staton de la tutmonde kreskanta nombro de rifuĝintoj – homoj forpelitaj el siaj hejmoj pro konflikto, kaj enplektitaj en armitaj disputoj ne de ili kreitaj. Kongrue kun nia ĉefa celo, nia organizaĵo, Universala Esperanto-Asocio, aparte interesiĝas pri klopodoj faciligi la lingvan situacion de tiuj rifuĝintoj.

Rifuĝintoj perdis pli ol siajn hejmojn kaj sian vivpanon: ili perdis ankaŭ la komunumojn kaj kulturojn, kiuj subtenas ilin. Ofte la lingvoj de tiuj komunumoj ne estas vaste parolataj en la lokoj, en kiuj ili nun troviĝas. En tiaj cirkonstancoj, ili despli malfacile kapablas klarigi sian situacion al aliaj, kompreni eĉ la simpatiajn reagojn de tiuj kiujn ili renkontas, kaj trakti kun la oficialaj funkciuloj kiuj ofte tenas en siaj manoj ilian estontecon.

Sekve ni forte petas al Unuiĝintaj Nacioj, ke la organizaĵo faru ĉion eblan por certigi

    1. Ke komunikado kun rifuĝintoj okazu en lingvoj, kiujn ili povas kompreni,
    2. Ke la funkciuloj, kiuj traktas kun la rifuĝintoj ricevu trejnadon pri tiuj lingvoj,
    3. Ke specialaj servoj estu starigitaj por aŭskulti kaj plusekvi la rakontojn kaj zorgojn de la rifuĝintoj en iliaj propraj lingvoj,
    4. Ke edukaj servoj en taŭgaj lingvoj estu disponigataj al rifuĝintaj infanoj kies lernado estis interrompita kaj kies estonteco estas sekve endanĝerigata.

Komprenema atento al la lingvaj bezonoj de rifuĝintoj estas ne nur principa demando sed ankaŭ demando de bona praktiko.

Enskribita en la statuton de nia Asocio estas respekto por ĉies rajtoj tia kia ĝi estas esprimata en la Universala Deklaracio de Homaj Rajtoj, kiun ni konsideras “esenca kondiĉo por nia laboro.” Socia justeco kaj lingva justeco iras manenmane. Ni devas memorigi nin pri tiu fakto en ĉiu tago de la jaro – sed speciale dum la Monda Tago de Rifuĝintoj.

Gazetara Komuniko, Nro 619 (UEA)

 

Pintkunveno de Grupo 20 fokusiĝos al inkluziva kaj interaktiva disvolvado

Pintkunveno de Grupo 20 fokusiĝos al inkluziva kaj interaktiva disvolvado


Emblemo de la Pintkunveno de la Grupo 20 en Hangzhou
 

La Pintkunveno de la Grupo 20 okazos en la ĉina urbo Hangzhou en septempo. Ĝia temo estas “pli efektiva kaj efika mond-ekonomia kaj financa regado”, kaj unu el la diskutotaj temoj estos “inkluziva kaj interaktiva disvolvado”. Sub la puŝado de Ĉinio, ĉi-jara pintkunveno unuafoje metos la demandon pri disvolvado sur elstara loko en la kadro de tutmonda makroekonomia politiko, kaj unuafoje ellaboros agadplanon por efektivigo de tagordo pri daŭripova disvolvado antaŭ 2030.

Antaŭenigi disvolvan kunlaboron de la Grupo 20 estas nepra vojo por serĉi novan movforton de la monda ekonomio. Malforta kresko de la monda ekonomio, malvigliĝo de komerco kaj investo kaj diferenco de makroekonomiaj politikoj de ĉefaj ekonomioj eble rezultigas novajn malegalecon kaj neekvilibron de disvolvado. Multaj evoluantaj landoj kun granda potenciala forto en la disvolvado kiel neekspluatita maro povas liberigi nekalkuleban kreskigan movforton kaj doni esperon al la monda ekonomio.

Ĉi-jara pintkunveno ellaboros agadplanon por efektivigo de la tagordo pri daŭripova disvolvado antaŭ 2030 kaj alprenos komunajn kaj naciajn agadojn. Ĉiuj membroj de la grupo aktive antaŭenpuŝos sian laboron kaj liveros subtenon al aliaj evoluantaj landoj por kontribui al la ĉefa tasko de UN per efektivaj agadoj.

Redaktoro: Liu Zijia

Ipernity: El Popola Chinio

Facebook: EPC El Popola Chinio

Twitter: El Popola Chinio

Barato : 51 gradoj : La tutmonda varmiĝo akceliĝas

Barato : 51 gradoj : La tutmonda varmiĝo akceliĝas

Jen nova signo de alarmo pri la klimato : “Unuiĝintaj Nacioj” konfirmas, ke pasinta aprilo estis la plej varma monato registrita sur la planedo, de post la komenco de temperaturaj registroj, en 1880.

La monatoj sin sekvas kaj similiĝas : en aprilo la temperaturo estis je 1,1 grado supera al la normala, cifero kiu maltrankviligas la klimatologojn, ĉar tio estas signo, ke la klimata varmiĝo akceliĝas.

Continuar lendo Barato : 51 gradoj : La tutmonda varmiĝo akceliĝas

Komenciĝis intertraktado de UN pri klimata ŝanĝo

Komenciĝis intertraktado de UN pri klimata ŝanĝo


Intertraktado pri klimata ŝanĝo en Bonno en marto 2014
 

    La 16an de majo en Bonno de Germanio komenciĝis la unua intertraktado de UN pri klimata ŝanĝo post la pariza konferenco. Delegitoj el preskaŭ 200 landoj kaj regionoj diskutas pri detaloj por efektivigo de la Pariza Interkonsento kaj aktivecoj por agadoj kontraŭ klimata ŝanĝo en la venontaj du semajnoj.

Tiutage en la malferma ceremonio, Christina Figueres, plenuma sekretario de la Kadra Konvencio de UN pri Klimata Ŝanĝo, diris, ke diversaj landoj jam prezentis decidon de komuna pritrakto de la defioj per la adopto de celoj kaj agada mekanismo, difinitaj en la Pariza Interkonsento, kaj nun ili devas montri plu spiriton de kunlaboro kaj ellabori detalojn de vojmapo por atingi la celojn.

Ŝi kredis, ke la procezo de la sekva intertraktado progresos pli rapide ol antaŭe, ĉar diversaj landoj jam konscias pri la minacoj alportitaj de la klimata ŝanĝo kaj oportunoj kreitaj de verda transformiĝo.

Kvankam unueco kaj kunlaboro estas la ĉefa tono de ĉiuj partioj por pritraktado de la klimata ŝanĝo, restas tradiciaj malakordoj inter evoluintaj kaj evoluantaj landoj pri agad-forto kaj financa subteno antaŭ 2020.

Tiu ĉi estas la ununura oficiala intertraktado antaŭ la konferenco pri klimata ŝanĝo en Marrakech de Maroko fine de la kuranta jaro.

Redaktoro: Liu Zijia

Ipernity: El Popola Chinio

Facebook: EPC El Popola Chinio

Twitter: El Popola Chinio

Mesaĝo de Universala Esperanto-Asocio okaze de la Internacia Tago de Familioj

tago de la familoj
Mesaĝo de Universala Esperanto-Asocio okaze de la Internacia Tago de Familioj

La 15-a de majo estas proklamita de Unuiĝintaj Nacioj kiel Internacia Tago de Familioj, kies ĉi-jara temo estas “Familioj, sanaj vivoj kaj daŭripova estonteco.” Nome de la miloj da Esperanto-parolantaj familioj, kiujn ĝi bonvenigis inter si tra la jaroj, Universala Esperanto-Asocio esprimas sian daŭran sindediĉon al tiuj idealoj, inkluzive de la tri aspektoj ĉi-jare emfazataj: (1) La sano kaj bonfarto de infanoj kaj junuloj, (2) Ekvilibro inter laboro kaj familio kaj la rezultaj sanefikoj, kaj (3) Pli alta vivokvalito por pli aĝaj personoj.

Ekde sia fondiĝo en 1908, nia Asocio laboras por transponti la dividojn inter homoj kaj nacioj. Ne malofte, tiuj agadoj kondukas al internaciaj geedziĝoj kaj la starigo de familioj kies infanoj ĉehejmas en pli ol unu kulturo. Antaŭ cent jaroj, meze de la Unua Mondmilito, la juna Asocio laboris, el sia sidejo en la neŭtrala Svislando, por utiligi la Internacian Lingvon Esperanto kiel ilon por reunuigi familiojn dividitajn de la milito, kaj por starigi kontakton kun familianoj izolitaj de siaj parencoj.

En pacaj periodoj, ni celis disvastigi la lernadon kaj instruadon de Esperanto kiel vojon por malfermi la mondon al infanoj, plenkreskuloj kaj pliaĝuloj egale; al ĉiuspecaj familioj, ĝi reprezentas unikan manieron por partopreni en internacia komunumo ligita per vojaĝado, literaturo kaj aliaj komunaj spertoj. Hodiaŭ la Asocio organizas ĉiujaran tutmondan renkontiĝon de Esperanto-parolantaj infanoj, kaj niaj aliĝintaj asocioj en pluraj landoj aranĝas ĉiujare kunvenojn de Esperanto-parolantaj familioj.

En la hodiaŭa tago, en mondo kie multe tro da familioj estas dividitaj aŭ dislokitaj de milito kaj politika subpremo, kie multe tro da familioj vivas en malriĉeco aŭ sub minaco de malsano, kie multe tro da familioj vane serĉas ekvilibron inter laboro kaj familio, ni esprimas nian firman deziron, nome de ĉiuj parolantoj de Esperanto, labori por pli sana, pli egaleca, pli tolerema kaj pli paca mondo en kiu la familia vivo estu plifortigita en maniero kiu avantaĝas ĉiujn familiojn kaj ĉiujn individuajn familianojn.

Gazetara Komuniko de UEA n-ro 612 (2016-05-06)