Nova Prezidanto de TEJO, Deguĉi Premio kaj UK Aŭkcio

 

Nova prezidanto de TEJO: Michael Boris Mandirola

TEJO KUN NOVA PREZIDANTO

La Komitato de TEJO, kiu kunsidis en la 71-a Internacia Junulara Kongreso, elektis la Estraron por la oficperiodo 2015–2017. La nova prezidanto estas la antaŭa vicprezidanto Michael Boris Mandirola el Italio. Li gvidos 5-personan teamon, en kiu ĉiuj krom li estas en la Estraro por la unua fojo.

Mandirola kandidatiĝis por la posteno surloke kaj ricevis pli da voĉoj (14) ol la ĝisnuna prezidanto Łukasz Żebrowski (8). Por tio necesis tamen du sekretaj voĉdonoj, ĉar en la unua neniu el la kandidatoj ricevis pli ol 50% de la voĉoj (Mandirola: 9, Żebrowski: 10). La Komitato signife malgrandigis la estraron: el la 7-kapa organo ĝi iĝis 5-persona, malgraŭ la rekomendo de la Elekta Komisiono elekti 8 estraranojn.

La novaj estraranoj kaj ilia taskodivido estas:
prezidanto Michael Boris Mandirola (Italio): kunordigo, eksteraj rilatoj, aktivula trejnado, rilatoj kun UEA; vicprezidanto Juliana Evandro (Brazilo; 16 voĉoj): informado, kulturo, homaj rimedoj, adoleska agado, Pasporta Servo; ĝenerala sekretario Arina Osipova (Rusio; 21 voĉoj): edukado, rilatoj kun ILEI kaj Fondumo Zamenhof; kasisto Cédric Marchal (Belgio; 23 voĉoj): subvencipetado, rilatoj kun UEA; Ariadna García Gutiérrez (Kubo; 23 voĉoj): landa agado, scienca kaj faka agado.

La Komitato elektis ankaŭ novan Elektan Komisionon, kiu konsistas el Rogier Huurman (19 voĉoj), Paweł Fischer-Kotowski (18) kaj Alexandre Raymond (13).

En la tagordo de la Komitato troviĝis la demando pri la jura sendependiĝo, por kiu TEJO ricevis en la antaŭa semajno aprobon de la Komitato de UEA. Tamen, la supera organo de la junulara sekcio de UEA ne pretis alpreni decidon jam nun, sed taskis al la Estraro finpretigon de la kontrakto inter UEA kaj TEJO. Nur tiam ĝi konsideros ĉiujn dokumentojn – la statuton kaj la kontrakton – kaj decidos pri ili en reta voĉdono. Tiun solvon subtenis 14 komitatanoj, dum 6 preferis tujan aprobon de la statuto.

En la kongreso estis akceptita la aliĝpeto de Benina Organizo de Junaj Esperantistoj (BOJE) kiel nova landa sekcio.

La 71-a IJK en la germana urbo Wiesbaden komenciĝis la 2-an kaj daŭros ĝis la 9-a de aŭgusto. Partoprenas ĉ. 300 esperantistoj el pli ol 50 landoj, plejparte sub 30 jaroj. En 2016 la kongreso okazos en Vroclavo, Pollando.

Komitatanoj kunsidas. Ĉe la prezida tablo Łukasz Żebrowski (verda ĉemizo) kaj maldekstre de li Michael Boris Mandirola.

Komitatanoj kunsidas. Ĉe la prezida tablo Łukasz Żebrowski (verda ĉemizo) kaj maldekstre de li Michael Boris Mandirola. (Foto: Pradip Ghimire.)

 

PREMIO DEGUĈI 2015 AL ÉVA FARKAS-TATÁR

Premio Onisaburo Deguĉi, “la esperantista pacpremio”, estis starigita per donaco de Oomoto en 1987 kaj estas aljuĝata ĉiujare. Ĝi konsistas el diplomo kaj monsumo de 2000 eŭroj.

Laŭ sia regularo la premio estas aljuĝata “pro meritoj en la utiligo de Esperanto kiel rimedo por monda paco kaj homara feliĉo, konforme al la idearo de d-ro Zamenhof kaj al instruoj de Onisaburo Deguĉi, kaj pro kontribuo al la celo de UEA kreskigi inter siaj membroj fortikan senton de solidareco kaj disvolvi ĉe ili komprenon kaj estimon por aliaj popoloj”.

La Estraro de UEA aljuĝis la Premion Deguĉi de la jaro 2015 al s-ino Éva Farkas-Tatár el Hungario. La decido estis anoncita la 1-an de aŭgusto en la Fermo de la 100-a UK en Lillo.

Éva Farkas-Tatár naskiĝis en 1924. Ŝi lernis Esperanton 37-jara en 1961. En la sekva jaro ŝi partoprenis la Universalan Kongreson en Kopenhago, kiu tiom ravis ŝin, ke ŝi decidis plene dediĉi sin al la instruado de Esperanto. Por perfektiĝi pri tiu arto ŝi iris al la UK en Hago en 1964 por sekvi lecionojn de Andreo Cseh. Tiel komenciĝis 50-jara instrua agado per la Cseh-metodo en multaj landoj kaj ĉe multaj UK-oj kaj plej diversaj aliaj renkontiĝoj. Ŝi revenigis la Cseh-metodon al ĝia kerno: la gaja, luda maniero, dank’ al kiu la lernantoj tuj ekparolas Esperante. Tiun arton ŝi transdonis al multaj novaj instruantoj, kiujn ŝi trejnis per Cseh-seminarioj, interalie en UK-oj.

Plurcentkapa aŭkcia publiko en la salono Lapenna.

ZAMENHOF-LETERO POR 1100 EŬROJ EN LA AŬKCIO EN LILLO

La tradicia kongreaa aŭkcio atingis unu el la plej bonaj rezultoj en sia historio. Sub la verva gvido de Humphrey Tonkin en la plenplena salono Lapenna kolektiĝis entute 4025 eŭroj. Pli bonan rikolton, 4528 eŭroj, oni atingis nur en la 83-a UK en Montpeliero en 1998. Kun 3579 euroj la aŭkcio de la 94-a UK en Bjalistoko en 2009 estas sur la tria loko.

Kiel atendite, plej altpreze estis vendita letero, per kiu L.L. Zamenhof kaj Klara Zamenhof dankis al ges-roj Arnhold pro ilia gastigado dum la 4-a UK en Dresdeno en 1908. En febra konkurso inter multaj interesatoj la letero fine estis vendita por 1100 eŭroj. La dua plej kosta aŭkciaĵo estis la honoro esti registrita kiel kongresano n-ro 1 en la 101-a UK en Nitro. Por ĝi necesis pagi 210 eŭrojn. La Kongresa Libro de la 7-a UK en Antverpeno en 1911 kostis 150 eŭrojn, dum la plej malnova aŭkciaĵo, Langue internationale Esperanto. Manuel complet, de Louis de Beaufront el 1899, kun lia aŭtora dediĉo al generalo Sebert, vendiĝis por 140 eŭroj. Por la raporto de L. Couturat kaj L. Leau pri la laboroj de la misfama Delegitaro, Compte rendu des travaŭ du Comité (15-24 oct 1907), necesis pagi 120 eŭrojn. Komuna foto de la kongresanaro de la unua UK en 1905 kaj la bindita volumo de La Revuo de la periodo septembro 1911 – aŭgusto 1912 atingis po 110 eŭrojn.

La rezulto de la aŭkcio iras favore al la Volontula Fondaĵo de UEA, escepte de 60 eŭroj kiel kontribuo al memorŝildo pri Gaston Waringhien en la liceo, kie li iam laboris kiel instruisto. Identa ŝildo estis inaŭgurita en la kongresa semajno ĉe lia naskiĝdomo.

el: Gazeta Komuniko de UEA

La ekologia erao jam komenciĝis

En multaj landoj pro la tervarmiĝo, la nuklea katastrofo de Fukuŝimo, pro regionaj detruoj de la medio aŭ simple pro profitigaj perspektivoj, registaroj provas superi la fosilian-nuklean eraon. Multaj landoj en tio estas same sukcesaj kiel Germanio. Kaj kelkaj el ili estas eĉ signife pli sukcesaj.

Ekzemple en la ĉina urbo Dezhou jam funkcias same multaj suntermaj centraloj kiel en la tuta EU. En Vjetnamio 146.000 biogasaj instalaĵoj kreis novan daŭrigeblan agrikulturon. Kaj la usona subŝtato Novjorko nuntempe entreprenas ĉion por ricevi ĝis la jaro 2025 la duonon de sia energio el renovigeblaj kaj malcentraj…

Legu pli kaj aŭskultu ĉe ESPERANTA RETRADIO

Pozitivaj Efikoj de kisado

Plifortigi la imundefendon, feliĉosentoj, plijuniga efiko: Kisado ne nur estas amuza, sed ĝi povas ankaŭ esti bona por la sano. Nun eĉ la scienco okupiĝas pri tio. Ni do vidu kiujn efikojn precize havas la kisoj:

Papilioj en la ventro, la odoro de la partnero en la nazo kaj la molaj lipoj de la alia sur la propraj: Por multaj homoj kisado estas unu el la plej belaj flankaj aferoj de la mondo. Sciencistoj kredas ke kisado havas eĉ porsanan utilon, kvankam ili ne metas tion en la centron de sia esplorado.

Jen kelkaj bonaj argumentoj por intensaj kisoj – apud la evidentaj…

Legu pli kaj aŭskultu ĉe ESPERANTA RETRADIO

Elsendo el Radio Vatikana

———- Forwarded message ———-
From: Mike Leon <esperantonz@gmail.com>
Date: 2015-08-03 20:57 GMT-03:00
Subject: Elsendoj de Radio Vatikana

Elsendoj de Radio Vatikana, enarkivigitaj che:
http://www.radio-vatikana-esperanto.org

2015-08-02, dim

Komentario:

Johano 6:24-35 … Per Kristo, la pano de la vivo, ni satigas la spiritan kaj materian malsaton; en la festo de la Pardono de Asizo … Rekomencighas la publikaj renkontoj de la papo; nova tvitera mesagho … Movadaj informoj: lastaj eventoj aranghitaj de kristanoj en la Universala Kongreso de Esperanto; la 21a Ekumena Esperanto-Kongreso.

 
2015-07-30, jhau
Tvitera mesagho: La plej efika atesto pri la geedzigho … Italio: vasta akcepto de rifughintoj en la diocezo Milano – prezento che Venecio de la filmo “La Plej Malgranda Armeo de la Mondo” pri la svisa gvardio – milionoj da kristanoj estas viktimoj de perfortajhoj kaj persekutado; Mezoriento: la situacio en Sirio; Israelo: estas neniu motivo ne aranghi pilgtimon al la sanktaj lokoj; Irano-Francio: vizito de la franca ministro pri eksterlandaj aferoj Laurent Fabius; Mjanmaro: miloj da prizonuloj estas liberigitaj … Movadaj informoj: IKUE deziras ke junaj IKUE-anoj partoprenu la venontjaran Mondan Junularotagon; komuna IKUE-KELI kunveno che la Universala Kongreso; ekumena kongreso en Strasburgo.
 
2015-07-29, mer
Tvitera mesagho: Karaj gejunuloj, ne timu geedzighon … Vatikanurbo: du gravaj eventoj por Cor Unum, fako de Vatikano pri la karitatagado; Ghenevo: internacia akordo eliminos la doganon por centoj da teknikajhoj; Vatikanurbo: Ekspozicio Reciproka Beno, Papo Johano Paulo la Dua kaj la Juda Popolo; Francio: tri gravaj datrevenoj che Taize; Hungario: landlima barilo estos finkonstruita en augusto – komentoj de la episkopo de Szeged – shoko pro fotoj de migrantoj amasigitaj en fermitaj trajnoj; Turkio: armeanoj embuskitaj – interkonsento pri bufroshtato laulonge de la siria landlimo; Etiopio: la vizito de prezidanto Obama; Libio: mortkondamno por filo de Muammar Gaddafi
 
Radio Vatikana: Programoj en Esperanto http://eo.radiovaticana.va Sondosiero: Lau peto kaj podkasto – Live Now – Search Podcast – Select: Esperanto – Search
Programo Mia Amiko: http://esperanto.brazilo.org
Twitter: @MiaAmiko


Posted By Blogger to Esperanto-Movado at 8/04/2015 07:02:00 PM